აზიური ფაროსანა და მასთან ბრძოლის მეთოდები

გაზაფხული მოვიდა და ნელ-ნელა წამოიწია ისეთმა მწვავე საკითხმა, როგორიც აზიური ფაროსანაა. ამიტომ გადავწყვიტეთ დღევანდელი პოსტი ამ მავნებლისთვის მიგვვეძღვნა. რას წარმოადგენს აღნიშნული მწერი, როგორ მრავლდება და რა მეთოდებით შეიძლება მასთან ბრძოლა.

აზიური ფაროსანა საქართველოში პირველად 2015 წელს დაფიქსირდა, თუმცა 2017 წლამდე დიდი გამოხმაურება ამ ამბავს არ მოჰყოლია. 

ფაროსანა აზიანებს ხეხილოვან, კენკროვან და ბოსტნეულ კულტურებს, განსაკუთრებით: ატამს, ვაშლატამას, ვაშლს, მსხალს, ჟოლოს, პომიდორს, წიწაკას და მზესუმზირას.

სანამ ფაროსანასთან ბრძოლის მეთოდებზე გადავიდოდეთ მოკლედ მოგიყვებით ამ მწერის შესახებ.

მწერი აპრილის ბოლოს, მაისის დასაწყისში სახლდება სხვადასხვა მცენარეზე და გვიან შემოდგომამდე მავნეობს. თავის საცეცებს ასობს ნედლ ნაყოფში, ათხიერებს შიგთავსს, რსაც საბოლოოდ მივყავართ ნედლეულის გაფუჭებამდე. ეს პროცესი გვიან შემოდგომამდე გრძელდება. ზამთარში კი ფაროსანა ინაცვლებს სახლებში, ცხოველების სადგომებში და ფოთლების ქვეშ, იქ, სადაც თბილა და შეუძლია დადოს კვერცხები. 

ერთი ფაროსანა საშუალოდ 200 კვერცხს დებს. გამოჩეკვას 4-5 დღე სჭირდება. ხოლო ზრდასრულობამდე მისვლას 50-55 დღე.

არასოდეს დაიზაროთ აზიური ფაროსანას მექანიკური განადგურება. ჩათვალეთ, რომ ერთი მავნებლის განადგურებით პოტენციურ 200-ს ანადგურებთ.

ქიმიური პრეპარატები, რომელიც მავნებლის წინააღმდეგ გამოიყენება:

• ტალსტარი - ხარჯვის ნორმა 0.6-1ლ./ ჰექტარზე.
• ზონდერი - ხარჯვის ნორმა 0.6-1ლ./ ჰექტარზე.
• ინსეკარი - ხარჯვის ნორმა 0.6-1ლ./ ჰექტარზე.
• კურა-კურა - ხარჯვის ნორმა 0.6-1ლ./ ჰექტარზე.
• პირინექს სუპერი - ხარჯვის ნორმა 0,8-1,5ლ./ჰა.
• ეფდალ-ფოსეტრინი - ხარჯვის ნორმა 0,4 ლ./ჰა.
• არივო - ხარჯვის ნორმა 0,2 ლ./ჰა.
• აქტარა - ხარჯვის ნორმა 0,12-0,14 კგ./ჰა.

შეწამვლის ხუთი ფაზა უნდა დაიცვათ:

პირველი - ივნისის დასაწყისი ან შუა რიცხვები.

მეორე - ივნისის ბოლო ივლისის დასაწყისი.

მესამე - თხილის მოსავლის აღების შემდეგ.

მეოთხე - ივლისის ბოლო აგვისტოს დასაწყისში.

მეხუთე - საჭიროებისამებრ. თუკი სიმინდის ნათესებში ისევ შენიშნავთ მომრავლებულ მავნებლებს.

თუ გყავთ ფუტკარი, მოარიდეთ შეწამვლის პროცესს და არ გამოუშვათ სკებიდან რამდენიმე საათის განმავლობაში.

როგორ ვებრძოლოთ ფაროსანას შენობებში

1. მუყაოსგან შეკარით მარტივი კონსტრუქცია, ყუთი, რომელშიც ჩაეტევა კვერცხის ჩასალაგებელი ფირფიტები. მსგავს ადგილებს ფაროსანა უფრო ეტანება, შესაბამისად თქვენ გექნებათ მახე, სადაც შეიტყუებთ მავნებლებს და შემდეგ მექანიკურად გაანადგურებთ მათ.

2. შეაგროვეთ მწერები მტვერსასრუტით და შემდგომ გაანადგურეთ მექანიკურად.

3. ინსექტიციდით (შესაწამლი) გაჭღენთილი ბადეები, რომელზეც დამაგრებულია 2-3 ერთეული ფერომონი, დაამაგრეთ პერიმეტრზე. მავნებელი ბადესთან შეხებისთანავე კვდება.

ყურადღება!

აუცილებლად დაიცავით უსაფრთოხების წესები. დეტალური ინფორმაცია იხილეთ აქ: www.nfa.gov.ge

გისურვებთ წარმატებას!