რატომ შემოდის ხმაური და სიცივე მეტალო-პლასტმასის ფანჯრებიდან?
უმეტესობას გვახსოვს ის დღე, როდესაც ხის კარ-ფანჯარა ეყენა სახლებში. გადაქექილი საღებავი, გაუხეშებული ზედაპირიდან გამოჩრილი ხიჭვები, რომელიც ხშირად გვერჭობოდა ხელებში. გარდა ამისა, მთავარ პრობლემად მაინც ის რჩებოდა, რომ სეზონის ცვალებადობასთან ერთად, ხე ხან იბერებოდა ხან პირიქით - იჩუტებოდა. ამის გამო, ზამთარში და სიცივეში სახლში მაინც ვერ ვინარჩუნებდით სასურველ ტემპერატურას.
ბოლოს და ბოლოს შემოვიდა ხის კარ-ფანჯრების ალტერნატიული ვარიანტი, მეტალო-პლასტმასი. თავიდან არსებობდა ათასგვარი მითი, რომ ახალი მასალა საზიანოა ჯანმრთელობისთვის, თუ მაინც გადაწყვეტდი გაკეთებას, ფასი ჰქონდა საკმაოდ მაღალი, რის გამოც ყველას არ შეეძლო შეეცვალა სახლებში კარ-ფანჯარა.
მოკლედ, ბოლოს მოვიდა დრო, როდესაც ადამიანების უმეტესობამ აიხდინა ოცნება და გამოცვალა კარ-ფანჯრა.
თუმცა მომწოდებლებს და მუშებს რატომღაც ყოველთვის ავიწყდებათ გაგვაფრთხილონ ორი უმნიშვნელოვანესი ფაქტორის შესახებ, რაც აუცილებლად უნდა გაითვალისწინოს ყველამ, ვისაც სახლში მეტალო-პლასტმასის კარ-ფანჯარა აქვს.
პირველი - ყველა მოძრავი დეტალი, რომელიც კი აქვს კარ-ფანჯარას პერიოდულად უნდა დაიზეთოს. გამოიყენეთ მანქანის ზეთი უკეთესი შედეგის მისაღებად. ჩვეულებრივ ეს პროცედურა წელიწადში ორჯერ უნდა ჩაატაროთ, თუმცა ერთხელ მაინც თუ მოახერხებთ, დიდი ხნით შეინარჩუნებთ ამდენი ხნის ნანატრ, ახალ კარ-ფანჯარას.
მეორე - ეს ყველაზე მნიშვნელოვანი ფაქტორია. მეტალო-პლასტმასის კარ-ფანჯარას აქვს ორი რეჟიმი, ზაფხულის და ზამთრის. სეზონის ცვალებადობასთან ერთად, აუცილებელია ამ რეჟიმების შეცვლაც, წინააღმდეგ შემთხვევაში კონსტრუქციაში ჩამაგრებული რეზინები გაცვდება და თქვენი ნანატრი თბო - და ხმის იზოლაცია წარსულს ჩაბარდება.
იცოდეთ, რომ სრულებით არ არის აუცილებელი ამ პროცედურისთვის ყოველწლიურად გამოიძახოთ მუშები, რომლებიც ზედმეტ თანხებს აიღებენ. შეგიძლიათ ზემოხსენებული წესები თავადაც მარტივად დაიცვათ.
მაშ ასე!
პირველ რიგში გამოაღეთ ფანჯარა და დაათვალიერეთ საკეტის მიმდებარე ადგილები. ყველა თანამედროვე კონსტრუქციას აქვს ე.წ. ექსცენტრიკები.
ექსცენტრიკი - ოვალური ფორმის დეტალი, რომელიც შიგნიდან სხვადასხვა ფორმის შეიძლება იყოს. სწორედ ამ დეტალის ლავირებით ხდება ზამთრის და ზაფხულის რეჟიმების დარეგულირება კარ-ფანჯარაზე.
რაც უფრო დიდია ფანჯარა, ექსცენტრიკების რაოდეობაც იზრდება. სპეციალური ინსტრუმენტის საშუალებით (ინსტრუმენტი უნდა იმეორებდეს ექსცენტრიკის შიდა ფორმას და ზუსტად ერგებოდეს მას), მომართეთ ისინი საჭირო რეჟიმზე.
ჰორიზონტალური მდგომარეობა ზამთრის რეჟიმზე გადაყვანაა, ხოლო ვერტიკალური - ზაფხულისაზე.
გახსოვდეთ, სანამ დაიწყებდეთ რეჟიმების შეცვლას, აუცილებელია გაიგოთ, რა რეჟიმზე აყენია კარ-ფანჯარა მოცემულ მომენტში.
ამის შემოწმება საკმაოდ მარტივია. ჩააყოლეთ ფანჯარაში თაბახის ფურცელი. თუკი ჩაკეტილ მდგომარეობაში შეძლებთ ქაღალდის მარტივად გამოცურებას, ეს იმას ნიშნავს, რომ რეჟიმი ზაფხულის არის, თუ ვერა - ე.ი. ზამთრის.
მაშ ასე, თუკი თქვენი მეტალო-პლასტიკის ფანჯრები ზუზუნებს ქარის დროს, აღარ აკავებს გარედან შემომავალ ხმაურს და ზამთარში სიცივეს უშვებს, ეს იმის მანიშნებელია, რომ თქვენ, როგორც უმრავლესობას, არ გქონდათ ინფორმაცია ფანჯრის რეჟიმების შესახებ.
თუკი რეჟიმის დარეგულირების შემდეგ პრობლემა მაინც დაგრჩათ ეს იმის მანიშნებელია, რომ და რეზინა გაცვდა, თუმცა არც ეს არის დიდი პრობლემა. კარ-ფანჯრის რეზინა, საკმაოდ მარტივი გამოსაცვლელია. ამის შესახებ ჩვენს მომდევნო პოსტებში აუცილებლად დავწერთ.
გისურვებთ წარმატებას!
