როგორ გამოვთვალოთ, რა სიმძლავრის კონდიციონერი გვჭირდება?!

ზაფხული მოდის. შესაბამისად, ვისაც არ აქვს ჯერ დამონტაჟებული კონდიციონერი, იწყებს ამ საკითხზე ფიქრს.

ყოველ წელს ვუსვამთ თავს შეკითხვას: რაში გვჭირდება კონდიციონერი? იქნებ ორი თვე რამენაირად გავუძლო?!

ყოველ წელს ვფიქრობთ, რომ არ გვინდა მეტი დენის გადასახადი მოგვივიდეს, რის გამოც სიცხისგან შეწუხებულებს არც ღამე გვაქვს მოსვენება, არც დილით.

იცოდეთ, თუ კონდიციონერს სწორად შეარჩევთ და გაითვალისწინებთ ფართს, სადაც აპირებთ მის დამონტაჟებას, მაშინ ელექტროენერგიის გადასახადი დიდად არ გაგეზრდებათ.

ამ პოსტში განვიხილავთ, როგორ გამოვთვალოთ კონდიციონერის სიმძლავრე, რომელიც სახლში უნდა დავამონტაჟოთ.

მაშ ასე, დავიწყოთ.

რა თქმა უნდა, შეგიძლიათ გამოიყენოთ სპეციალისტების რჩევა და კონდიციონერი ბრმად შეიძინოთ, თუმცა სიფრთხილეს თავი არ სტკივა, ამიტომ იცოდეთ, როგორ გამოითვლება თქვენთვის საჭირო კონდიციონერის სიმძლავრე.

გაგრილების სიმძლავრე ის ძირითადი მახასიათებელია, რომელიც კონდიციონერის ყიდვისას უნდა გაითვალისწინოთ.

საორიენტაციოდ მიიჩნევა, რომ 2,7 - 3 მ.-იანი ჭერის შემთხვევაში ყოველ 10 მ^² - ზე 1 კვტ. სიმძლავრე უნდა გაითვალისწინოთ. ანუ ფართი, სადაც აპირებთ კონდიციონერის განთავსებას უნდა გაყოთ 10-ზე და მიიღებთ დაახლოებით სიმძლავრეს, რაც თქვენთვის საჭიროა.

თუმცა ეს გამოთვლის ხერხი არის ძალიან მიახლოებითი ამიტომ ყოველთვის დაუმატეთ 20-30%, რადგან იმისთვის, რომ ზუსტად დაადგინოთ, თქვენთვის საჭირო გაგრილების სიმძლავრე, უნდა გაითვალისწინოთ:

• შენობის მოცულობა,
• ჭერის სიმაღლე,
• შემინვის ფართი,
• საიდან შემოდის სინათლე,
• ადამიანების რაოდენობა შენობაში,
• ელექტრომოწყობილობების რაოდენობა,
• შენობის დანიშნულება და ა.შ.

არსებობს გაგრილების სიმძლავრის გამოთვლის უფრო ზუსტი მეთოდიც.

წარმოგიდგენთ ფორმულას: Q = Q1+ Q2+ Q3.

Q - გაგრილების სიმძლავრე.

Q1 - შენობის სითბოს ნაკადი (მის გამოსათვლელად ოთახის ფართობი (S) უნდა გადაამრავლოთ ჭერის სიმაღლეზე (H) და გადაამრავლოთ სითბური დატვირთვის კოეფიციენტზე (G). G განსხვავდება ერთმანეთისგან იმის მიხედვით, თუ რამდენად მზიანია შენობა. ნაკლებად მზიანი შენობის შემთხვევაში G არის 30, საშუალოსი - 35 , ხოლო ძალიან მზიანის - 40).

Q2 - შენობაში მყოფი ადამიანების სითბოს ნაკადი. საშუალოდ ერთ ადამიანზე 100 ვტ. იანგარიშება. შესაბამისად Q2= 100 ადამიანების რაოდენობაზე.

Q3 - ელექტრო მოწყობილობების სითბოს ნაკადი. ერთ კომპიუტერზე ან ტელევიზორზე საშუალოდ 300 ვტ. ანგარიშედება. შესაბამისად, Q3 = 300 x ელექტრომოწყობილობების რაოდენობაზე.

ეს არის ფორმულა, რომელიც დაგეხმარებათ სწორად შეარჩიოთ კონდიციონერი თქვენი სახლისთვის.

გისურვებთ წარმატებას!