3 რჩევა, როგორ გავიყვანოთ ახალგარემონტებული სახლიდან საღებავის სუნი
ბოლო დროს უფრო და უფრო აქტუალური ხდება რემონტის საკუთარი ხელით გაკეთება. რატომ ვხარჯოთ ზედმეტი დრო და ფული, როდესაც შეგვიძლია საკუთარი ძალებით გავუმკლავდეთ ყველაფერს.
დღევანდელი პოსტი ღებვას დავუთმოთ. შპალერი ნელ-ნელა კარგავს აქტუალობას და უფრო მეტი ბინა და სახლი გვხვდება, სადაც კედლები არის შეღებილი.
შეღებილი კედელი უფრო ლამაზია, აჩენს მეტ სივრცეს და ყოველთვის გაქვს შესაძლებლობა მარტივად შეცვალო დიზაინი თუ არ იქნები კმაყოფილი შედეგით.
მაშ ასე, როგორ მოვემზადოთ და შევღებოთ კედლები ჩვენით?!
1. მოიმარაგეთ საჭირო ტანისამოსი, იმიტომ რომ, როგორც არ უნდა ეცადოთ, საღებავით მაინც დაისვრებით. შეიძინეთ სამშენებლო აღჭურვილობა, მინიმუმ ხელთათმანები მაინც, რათა თავიდან აირიდოთ ხელზე საღებავის მოხვედრა.
2. კარგად შეფუთეთ იატაკი. დაგჭირდებათ ბევრი გაზეთი და ცელოფანი, რადგან საღებავით არ დასვაროთ პარკეტი და თავიდან აირიდოთ ზედმეტი პრობლემები.
3. გადაწყვიტეთ, რა ფერებში გსურთ იყოს გადაწყვეტილი კედლები, შეიძინეთ საღებავის მცირე რაოდენობა და გატესტეთ კედელზე. რამდენიმე ვარიანტი შეგიძლიათ გატესტოთ იქამდე, სანამ მთელი კედლის შეღებვას დაიწყებდეთ.
4. მას შემდეგ, რაც ზუსტად ჩამოყალიბდებით ფერზე, მოიმარაგეთ სარემონტო აქსესუარები. დაგჭირდებათ სათავსო საღებავის გასახსნელად და გახსნილი საღებავის ჩასასხმელად, რომლიდანაც პირდაპირ შეუდგებით კედლების ღებვას, ფუნჯები და როლერები.
ამ ოთხი მარტივი ნაბიჯის შემდეგ, შეგიძლიათ თამამად შეუდგეთ ღებვას.
ახლა კი რამდენიმე რჩევა, რომელიც გაგიმარტივებთ ამ პროცესს:
იმისთვის, რომ დიდი ხნით შეინარჩუნოთ სამშენებლო აღჭურვილობა, იხმარეთ ფოლგის ქაღალდი.
1. სათავსოში, სადაც ასხამთ საღებავს, ჩააფინეთ ფოლგა და მხოლოდ შემდეგ ჩაასხით საღებავი შიგნით. ამით თავიდან აირიდებთ სათავსოს დასვრას, რომელიც შემდგომ საკმაოდ რთული გასაწმენდია და, თანაც დაზოგავთ თანხას ზედმეტი სარეცხი საშუალებების ყიდვაში. როდესაც მორჩებით ღებვას, ფოლგას ბოლოებს მოუკეცავთ და პირდაპირ ნაგავში გადააგდებთ.
2. თუკი გადაწყვეტილი გაქვთ არა მხოლოდ კედლების, არამედ კარის შეღებვაც, ამაშიც აუცილებლად გამოგადგებათ ფოლგის ქაღალდი, რომელიც შეგიძლიათ შემოაკრათ კარის სახელურს და აირიდოთ თავიდან მისი დასვრა. სხვა შემთხვევაში, სახელურის დასაცავად მრავალ ფენად უნდა გადააკრათ გაზეთები და ნაჭრები, რასაც მეტი დრო და ენერგია მიაქვს.
ახლა კი მთავარი და, ყველაზე მნიშვნელოვანი: როგორ გავიყვანოთ ბინიდან საღებავის საკმაოდ მძაფრი და უსიამოვნო სუნი, რომელიც ყოველთვის თან სდევს რემონტს?!
რა თქმა უნდა, ყველამ ვიცით, რომ სუნის გაყვანის უპირველესი საშუალება ბინის განიავებაა, თუმცა ისედაც გაწელილი რემონტის შემდეგ, როდესაც ჩვეულ რიტმში დაბრუნება გვეჩქარება, შეგვიძლია პროცესი ოდნავ დავაჩქაროთ კიდეც.
აი რამდენიმე ხერხი:
1. საჭრო მასალა: სუფრის ძმარი, წყალი და პირსახოცი.
ნახევარი ჭიქა ძმარი გავხსნათ 5 ლიტრ წყალში, ჩავალბოთ პირსახოცები და გავფინოთ სახლში. 4 საათის შემდეგ ჩამოვხსნათ, თავიდან დავალბოთ და ისევ გავფინოთ რამდენიმე საათით. ასე გავიმეოროთ რამდენჯერმე და თქვენთვითონვე დარწმუნდებით, რამდენად სწრაფად მოახერხებთ განდევნოთ საღებავის სუნი სახლიდან.
2. საჭირო მასალა: სანთელი.
რაც არ უნდა უცნაური იყოს, საღებავის სუნი ასევე მარტივად გააქვს დანთებულ სანთელსაც. რაც შეიძლება ბევრი სანთელი დაანთეთ ახლადშეღებილ სახლში და რამდენიმე საათი აცადეთ, რომ ჩაიწვან. შემდეგ გაანიავეთ და შედეგით გაკვირვებული დარჩებით.
3. საჭირო მასალა: მარილი, წყალი.
გაავსეთ ფართოპირიანი ჭურჭელი მარილიანი წყლით (მარილის კონცენტრაცია საკმაოდ დიდი უნდა იყოს) და დაალაგეთ ოთახებში. სითხე შეიწოვს არასასიამოვნო სუნს, ამიტომ 4-5 საათის შემდეგ აუცილებლად უნდა გამოცვალოთ და ასე გააგრძელოთ, სანამ ბოლომდე არ გაიყვანთ სახლიდან საღებავის სუნს.
გისურვებთ წარმატებას!
