როგორ მოვაცილოთ სოკო სახლიდან

დღევანდელი პოსტი შეეხება ერთ-ერთ ყველაზე უსიამოვნო და, ზოგის აზრით, მოუგვარებელ პრობლემას, ობს და სოკოს ჩვენს სახლებში.

დავიწყოთ თავიდან.

სოკოს და ობის გაჩენის მთავარი მიზეზი არის ნესტი. შესაბამისად, სახლის იმ ნაწილში, სადაც ყველაზე დიდი ტენიანობაა (სააბაზანო, სამზარეულო), უფრო ხშირად ვეჯახებით ამ პრობლემას.

მეტლახის ღარებში გაჩენილი სიშავე, კედლებსა და ჭერზე გაჩენილი ყავისფერი ლაქები. ეს ყველაფერი არის სოკო, რომელიც, გარდა იმისა, რომ ვიზუალურად არის ცუდი შესახედი, ჯანმრთელობისთვისაც საკმაოდ საზიანოა.

ხშირად, მოუცლელობის გამო, ვერ ვახერხებთ ჩავუღრმავდეთ პრობლემას და იქამდე ვარიდებთ თავს, სანამ მეტლახი თვალსა და ხელს შუა არ შემოგვემსხვრევა, შპალერი არ ჩამოიხევა ან ჭერი სულ მთლად არ დაიფარება ყავისფერი ლაქებით.

ამის შემდეგ თქვენი ბინა საჭიროებს რემონტს. რემონტი კი მოგეხსენებათ, რამხელა თავის ტკივილია.

პირველ რიგში ვიცოდეთ, როგორ ავირიდოთ თავიდან მსგავსი პრობლემის წარმოქნა:

• დროულად ჩაატარეთ სანტექნიკური სამუშაოები;
• ხშირად ანიავეთ ბინა, განსაკუთრებით სააბაზანო და სამზარეულო;
• აბაზანის კარი დატოვეთ ოდნავ შეღებული და არ დაუშვათ ნესტის დაგროვება;
• კარადაში შენახვამდე, კარგად გააშრეთ სარეცხი;
• არ გააშროთ სარეცხი სახლში.

თუმცა, თუ ამ მარტივმა მეთოდებმა შედეგი მაინც ვერ გამოიღო და სოკომ შემოაღწია თქვენს სახლებში, ნუ იჩქარებთ მკლავების დაკაპიწებას და სარემონტო სამუშაოების წამოწყებას. თუ არც იმის დრო და საშუალება გაქვთ, შეიძინოთ ძვირადღირებული ანტისეპტიკური საშუალებები, ჩვენ გასწავლით რამდენიმე ე.წ. ხალხურ მეთოდს, პრობლემასთან გასამკლავებლად.

მაშ ასე:

გამათეთრებელი. ( საჭირო მასალა - გამათეთრებელი, წყალი, რეზინის ხელთათმანები, რესპირატორი, ჯაგრისი. )

ზემოქმედებს ყველა სახის სოკოზე. გამოიყენეთ მხოლოდ არაფოროვანი ზედაპირის დასამუშავებლად (შუშა, ფილა, აბაზანა). პროპორცია დაიცავით შემდეგნაირად: გამათეთრებელი (1 ნაწილი): წყალი (10 ნაწილი). მიასხით ხსნარი დაზიანებულ ადგილს, დაამუშავეთ ჯაგრისით. ხსნარი არ ჩამორეცხოთ წყლით. მუშაობის დასრულებისთანავე კარგად გაანიავეთ სახლი.

ძმარი. ( საჭირო მასალა - თეთრი ძმარი, წყალი, შესაშხურებლად გამფანტავი (შეგიძლიათ გამოიყენოთ რომელიმე ძველი საწმედი საშუალების ქილა. გამოყენებამდე კარგად გამორეცხეთ) ).

უბრალოდ მიაპკურეთ ძმარი დაზიანებულ ადგილებს, გააჩერეთ ერთი საათით, შემდეგ კი წლით ჩამორეცხეთ და კარგად გააშრეთ ზედაპირი.

წყალბადის ზეჟანგი. ( საჭირო მასალა - წყალბადის ზეჟანგის 3%-იანი ხსნარი, წყალი, ჯაგრისი, გამფანტავი. )

დაზიანებულ ადგილს მიასხით წყალბადის ზეჟანგი დიდი ოდენობით, ისე, რომ ხსნარი კარგად შეიწოვოს. გააჩერეთ 10 წუთით, შემდეგ ჯაგრისით და წყლით კარგად ჩამორეცხეთ.

გისურვებთ წარმატებას!