როგორ მოვაშოროთ ხის ავეჯს ნაკაწრები
ვინც ამ ბლოგს კითხულობს, მისთვის დიდი მნიშვნელობა აქვს, როგორ გარემოში ცხოვრობს და ყველანაირად ცდილობს, გაილამაზოს ადგილსამყოფელი.
თუმცა, ყველა ვთანხმდებით იმაზე, რომ რთულია დიდი ხნით შეინარჩუნო ახლადგარემონტებულ სახლში სიახლის შეგრძნება.
ყოველდღიურად უნებლიედ, ვაზიანებთ ჩვენთვის საყვარელ ნივთებს, მათ შესაკეთებლად კი ხშირად დრო და სახსრები არ გვყოფნის და გვიწევს თვალი დავხუჭოთ ისეთ პრობლემებზე, როგორიც, მაგალითად ნაკაწრებია, ხის ავეჯზე.
ვისაც სახლში შინაური ცხოველი ან პატარა ბავშვი ყავს, მისთვის ეს პრობლემა გაცილებით უფრო აქტუალურია. დარწმუნებული ვართ უმარავი ქიმიური საშუალება გიცდიათ პრობლემის აღმოსაფხვრელად და არაერთ ავეჯის რესტავრატორსაც დამეგობრებიხართ, თუმცა ყოველთვის გაქვთ იმდენი დრო, რომ ბევრი ძვირადღირებული პროცედურა გაიაროთ.
ძებნის შემდეგ, მივაგენით 8 უმარტივეს ხერხს, როგორ დაფაროთ ნაკაწრები ავეჯზე ისე, რომ ეს დიდ ძალისხმევად არ დაგიჯდეთ, მაშ ასე:
- ნიგოზი
გარდა იმისა, რომ ნიგოზი გემრიელი და ჯანმრთელობისთვის სასარგებლო პროდუქტია, თურმე უებარი საშუალება ყოფილა ავეჯიდან ნაკაწრების გასაქრობად. გატეხეთ ნიგვზის ლებანი შუაზე და წაუსვით დაზიანებულ ადგილს. შეეცადეთ, რაც შეიძლება მეტი ზეთი მოხვდეს ნაკაწრს. შედეგით თქვენთვითონვე გაკვირვებული დარჩებით.
- ზეითუნის ზეთი + ძმარი
დოზირება: ¼ ჭიქა ძმარი + ¾ ჭიქა ზეთი. მიღებული ხსნარით გაწმინდეთ დაზიანებული ადგილები, დაელოდეთ შეშრობას და მშრალი ტილოთი კარგად გააპრიალეთ.
- კბილის პასტა
შეურიეთ კბილის პასტაში რამდენიმე წვეთი მცენარეული ზეთი, მიღებული მასა წაუსვით ავეჯის ზედაპირს, აცალეთ გაშრობა და მოაშორეთ სველი ტილოთი.
- ცვილი
დაიტანეთ ცვილი მყარ საგანზე, მაგალითად დანაზე და წაუსვით დაზიანებულ ადგილებს. ფრთხილად იმოქმედეთ, რომ დანამ თავიდან არ დააზიანოს ავეჯი. მას შემდეგ, რაც კარგად დაამუშავებთ ნაკაწრებს, მოაშორეთ ზედმეტი ცვილი ღრუბლის დახმარებით.
- იოდი ან მანქანის ზეთი
ეს მეთოდი განსაკუთრებით იმ შემთხვევაში გამოგადგებათ, თუკი თქვენი ავეჯი მუქი ფერის ხისგან არის დამზადებული. დაზიანებული ადგილების დამუშავების შემდეგ დაიცადეთ ცოტა ხანი და მოაშორეთ ზედემეტი სითხე მშრალი ნაჭრით.
- ჩაის ნაყენი
გააკეთეთ ე.წ. ჩეფირი, ანუ აცადეთ ჩაის ფერს ბლომად და ბოლომდე გამოუშვას ფერი, შემდეგ კი ბამბის მეშვეობით კარგად მოწმინდეთ დაზიანებული ადგილები.
- ყავა
ისევე, როგორც ჩაი, ყავაც შეგიძლიათ გამოიყენოთ დაკაწრული ავეჯის აღდგენაში. 1 ს/კ ყავის გრანულებს დაასხით ცოტა ცხელი წყალი, ისე რომ მიიღოთ სქელი მასა და წაუსვით ბამბით დაზიანებულ ადგილებს. შეეცადეთ მხოლოდ ნაკაწრებზე მოხვდეს ეს მასა და არ შეეხოთ დაუზიანებელ ადგილებს. პროცედურის შემდეგ, ნარჩენები მშრალი ტილოთი მოწმინდეთ.
- ნახერხი წებოთი
რა გააქრობს დაზიანებებს ხის ზედაპირიდან იმაზე უკეთ, ვიდრე თვითონ ხეა?!
გაურიეთ ცოტაოდენ ხის ნახერხში წებო და მიღებული მასა ფრთხილად წაუსვით დაზიანებულ ზედაპირს. პროცედურა გაიმეორეთ რამდენჯერმე, შემდეგ კი გააპრიალეთ ზედაპირი. მართალია ეს ყველაზე შრომატევადი მეთოდია, თუმცა შედეგი ღირს წვალებად.
გაითვალისწინეთ, სანამ რომელიმე მეთოდს აირჩევდეთ, გამოცადეთ ის პატარა მონაკვეთზე, რომელიც რთულად შესამჩნევია, რათა თავიდან აირიდოთ უსიამოვნო სიურპრიზები.
გისურვებთ წარმატებას!
