როგორ შევღებოთ ჭერი სწორად

ყოველი ჩვენგანისთვის მნიშვნელოვანია გავალამაზოთ ადგილი, სადაც ვცხოვრობთ. ამისთვის ვხმარობთ ყველა ძალას, თუმცა ხშირად ხდება გაუთვალისწინებელი მოვლენები. განსაკუთრებით მაშინ, თუ კორპუსის მაცხოვრებელი ხართ და თქვენ ზემოთ გულმავიწყი მეზობელი ცხოვრობს, რომელსაც წყალი ხშირად გახსნილი რჩება, ხოლმე ან, რომელმაც ვერა და ვერ მოაბა თავი რემონტის გაკეთებას და ძველი მილების შეცვლას ან თუნდაც მეზობელი, რომელიც ისე აბრახუნებს ავეჯს, რომ თქვენს კედელს ნელ-ნელა ბზარები უჩნდება.

მოკლედ, ადამიანების უმრავლესობას უგემია სიმწარე, რასაც ქვია: „მეზობელმა წყალი ჩამომიშვა“ ან „ვერ გავიგე ამდენს რას დააჩოჩიალებს ავეჯს აქეთ-იქით“.  ჭერის გაფუჭება გაფუჭებად, მაგრამ შემდგომი ეტაპი ყველაზე უფრო მტკივნეულია. ვარიანტი რამდენიმეა:

1. მეზობელს მოყავს მუშა, რომელიც უშნოდ შეგითეთრებთ ჭერს.
2. თქვენი ხარჯებით მოგყავთ მუშა, რომელიც შეიძლება კარგად აკეთებს თავის საქმეს, მაგრამ ძალიან დიდანს უნდება, იმიტომ რომ სხვა საქმეებიც აქვს და ეს „იაფიანი“ სამუშაო არ არის მისთვის პრიორიტეტული.
3. არც მეზობელს მოყავს მუშა არც თქვენ გაქვთ დრო და თანხა იმისთვის, რომ ხელახლა აკეთებინოთ უკვე შეთეთრებული ჭერი.

გვინდა გითხრათ, რომ ჭერის შეღებვა სულაც არ არის იმდენად რთული საქმე, რომ თქვენთვითონ ვერ გაართვათ თავი. საქმეც მალე დასრულდება, დანახარჯებიც მინიმალური იქნება, იქიდან გამომდინარე, რომ მარტო მასალისთვის დაგჭირდებათ თანხა, რომელიც თამამად შეგიძლიათ აანაზღაურებინოთ აბეზარ მეზობელს.

პირველი და უმთავრესი ეტაპი ჭერის მდგომარეობის შეფასებაა. სწორედ ეს ნაბიჯი განსაზღვრავს შედეგის ხარისხიანობას.

მაშ ასე, ჭერის მდგომარეობა არის:

ახლადშეღებილი, მტვრის ფენით დაფარული და ლაქებიანი ან დაბზარული.

ორივე შემთხვევაში უნდა გამოიყენოთ ჭერის საღებავი, რადგან კარგად ფარავს ლაქებს და მიკრობზარებს (2-10 მმ.), არ აქვს სუნი, ნესტგამძლეა, დროთა განმავლობაში არ ყვითლდება, მალე შრება (20 წთ.), მარტივი მოსავლელია.

შემდეგი ეტაპი ზედაპირის მომზადებაა. იმის მიხედვით, თუ რამდენად კარგად გაართმევთ ამ ამოცანას თავს, შედეგი იქნება კარგი ან ცუდი.

1. დამტვერილი ჭერი - უბრალოდ კარგად მოაშორეთ ზედაპირს მტვერი და შეღებეთ პირდაპირ.
2. ლაქებით დაფარული ჭერი - შეღებვამდე 24 საათით ადრე ლილვაკის დახმარებით მხოლოდ ლაქები შეღებეთ. მხოლოდ მას შემდეგ, რაც გადაღებილი ლაქები მთლიანად გაშრება შეღებეთ მთლიანი ჭერი.
3. ჭერი, რომელის იქერცლება - პირველ რიგში კარგად უნდა გახეხოთ („გაშკურკოთ“), მოაშოროთ მთელი მტვერი. მხოლოდ ამის შემდეგ წაუსვით ფითხი (გაშპაკლეთ) იმისთვის, რომ გაასწოროთ ზედაპირი და შეღებეთ ჭერი.
4. ჭერი მიკრობზარებით - 2-10 მმ.-მდე ბზარების შემთხვევაში შეღებეთ პირდაპირ, საღებავი თავისით ამოავსებს ღარებს.

თუკი ბზარები 2-10 მმ.-ზე დიდია, მაშინ წაუსვით 2 ფენად ფითხი (შპაკლი), გახეხეთ (გაშკურკეთ) და მოაშორეთ მტვერი, შედგომ დააკვირდით, თუკი ბზარები ისევ შესამჩნევია, კიდევ ერთხელ წაუსვით ფითხი, დაელოდეთ სრულიად გაშრობას და დაიწყეთ ღებვა.

ღებვა

1. შეღებვა დაიწყეთ კუთხეებიდან და იმ ადგილებიდან, რომელიც კედელთან არის ახლოს. ლილვაკი ერთი მიმართულებით ამოძრავეთ.
2. ყოველი მომდევნო ფენა წინა ფენის პერპენდიკულარულად წაუსვით.
3. საღებავის საბოლოო ფენა წაუსვით სინათლის მიმართულებით.

გახსოვდეთ უსაფრთხოება და ჭერის ღებვისას აუცილებლად იხმარეთ რესპირატორი, რათა დაიცვათ თავი სამშენებლო მასალის შესუნთქვისგან.

გისურვებთ წარმატებას!