რა საფეხურებს გავდივართ კერამიკის ფილების გაკვრისას?!

წინა პოსტი კერამიკის ფილების შერჩევას მივუძღვენით. ახლა კი, მივყვეთ თემას და ფილების მიკვრის პროცესს გავეცნოთ.

როგორც უკვე ვთქვით, პირველ რიგში ეს სასარგებლოა მათთვის, ვისაც რემონტი აქვს წამოწყებული და არ იცის, კონკრეტულად რა ნაბიჯებს გადის მუშა, როდესაც ფილებს აგებს. რა სამშენებლო მასალას იყენებს, რამდენ დროსა და ფულს ხარჯავს, კონკრეტული საქმის გასაკეთებლად.

ასევე გვინდა აღვნიშნოთ, რომ კერამიკის ფილების კლასიკურად მიკვრა, არც ისეთი რთული პროცესია, რომ თავად ვერ გაუმკლავდეთ. ასე რომ, წაიკითხეთ და თავად განსაჯეთ, როგორ ჯობს.

მაშ ასე, დავიწყოთ კერამიკის ფილების დაგება.

ზედაპირის მომზადება

პირველი და უმთავრესი, აუცილებლად დარწმუნდით, რომ ზედაპირი, რომელზეც აპირებთ გააკრათ კაფელი თუ მეტლახი არის იდეალურად სწორი. ამის შემოწმებას თარაზოს მეშვეობით ადვილად შეძლებთ.

უმნიშვნელო უსწორ-მასწორობებს მარტივად აუვლით გვერდს, ზედაპირის ფრთხილი გაშკურკვით, თუმცა ზედმეტი პრობლემების თავიდან ასაცილებლად შესაძლოა დაგრუნტოთ და ისე შეუდგეთ ფილების გაკვრას. ყველაზე კარგად ფილები დაგრუნტულ ზედაპირს ეკვრის.

ფილების გაკვრა

პირველ რიგში უნდა დააყენოთ მაიაკები (სისწორის დასაცავად გააბით მათ შორის ძაფი ზედაპირიდან 5მმ.-ის დაშორებით), შემდეგ კი დაიწყეთ გაკვრის პროცესი.

გახსოვდეთ, გაკვრა იწყება შუიდან კიდეებისკენ მიმართულებით. კედლის ცენტრი მონიშნეთ ვერტიკალური ხაზის გავლებით იატაკამდე.

მიაქციეთ ყურადღება ე.წ. შოვებს. შოვები ის ღარებია, რომელიც ორ ფილას შორის ჩნდება. აუცილებელია, რომ ყველა ხაზი ერთმანეთს ემთხვეოდეს. იმისთვის, რომ სისწორე შეინარჩუნოთ, შეგიძლიათ გამოიყენოთ სწორი ფიცარი ე.წ. პლანკა, რომელსაც ფილებს ქვემოდან ამოუდებთ.

როდესაც ყველაფერს მოამზადებთ, ფილას უკანა მხრიდან უსვამთ წებოცემენტს 7-15 მმ. - სისქით, ადებთ ზედაპირს და რეზინის ჩაქუჩის ფრთხილი დაკაკუნებით ღრმად სვამთ ზედაპირში. კარგად დაკვირდით, რომ ფილა თანაბრად იყოს გადანაწილებული.

ასე მიყვებით ცენტრიდან კიდეებისკენ. გაითვალისწინეთ, რომ კედელსა და ფილას შორის არ უნდა დაგრჩეთ ჰაერი. ეს არის ერთ-ერთი პირველი მიზეზი იმის, თუ რატომ ცვივა კედლებიდან ფილები.

გაკვრის პროცესში შოვებს შორის იდგმება სპეციალური ჯვრები, რათა ვაკონტოლოთ მათი ზომა, რომელიც მიახლოებით 3მმ. უნდა იყოს. გაკვრის პროცესში წებოცემენტი აუცილებლად გამოვა შოვებში, მაგრამ არ შეშინდეთ. მოაშორეთ ის გაშრობამდე.

ფილების გაკვრის შემდგომ ვაშორებთ შოვებიდან მტვერს, ზედმეტ წებოცემენტს და ჯვრებს და გადავდივართ ბოლო ეტაპზე.

შოვების ამოვსება

მას შემდეგ, რაც ზედმეტი წებოცემენტი და მტვერი მოშორდება, ნახავთ, რომ შოვებს შორის დარჩება სივრცე, რომელიც აუცილებლად უნდა ამოივსოს. ამისთვის გამოიყენება ფერადი ან თეთრი შემავსებელი.

იცოდეთ!

ფილების დაჭრა ყოველთვის ხდება საჭირო. ამისთვის დაგჭირდებათ ისეთი სამშენებლო აღჭურვილობა, როგორებიც არის: კაფელის საჭრელი (იატაკის ფილებისთვის) და როლიკიანი მჭრელი (კედლის ფილებისთვის).

დაჭრის პროცესში ყოველთვის არის საშიშროება, რომ ფილა გაგიტყდეთ, ამიტომ მონიშნეთ ის ნაწილი, რომელიც უნდა მოაჭრათ და რამდენიმე წუთით (15-20) გააჩერეთ წყალში. ეს ჭრის პროცესს გაამარტივებს.

გისურვებთ წარმატებას!