ზაფხული გვიახლოვდება და ჩვენშიც დაუოკებელი სურვილი იღვიძებს, შევიტანოთ სიახლეები ცხოვრებაში.
იმისთვის, რომ სახლი ან ეზო ახალი ავეჯით გააწყოთ, სრულებით არ არის აუცილებელი ძვირადღირებულ მაღაზიებში სირბილი.
თქვენი ხელითაც შეგიძლიათ მარტივად, იაფად და, რაც მთავარია, საკუთარი დიზაინით შექმნათ ავეჯი, რომელიც ხალისსა და კომფორტს შემოიტანს თქვენს ცხოვრებაში.
დღევანდელი პოსტი პალეტის ავეჯს შეეხება. მისგან ათასნაირი ავეჯის დამზადებაა შესაძლებელი, მაგიდით დაწყებული საწოლებით დამთავრებული.
პალეტები ნებისმიერ მშენებლობაზე ძალიან იაფად იშოვება და შეგიძლიათ ათასნაირი დიზაინის ავეჯისთვის გამოიყენოთ.
მაშ ასე, დღეს მოგიყვებით, როგორ დავამზადოთ მაგიდა და სავარძელი პალეტებისგან.
ამისთვის დაგჭირდებათ:
- პალეტები;
- შალაშინი;
- ელექტროსახრახნი;
- ხრახნები;
- სტეპლერი;
- საღებავი (ფერების რაოდენობა თქვენს სურვილზეა დამოკიდებული);
- ლილვაკი;
- ხის ლაქი;
- წებო;
- ხელთათმანები;
- რესპირატორი.
პირველ რიგში დავამზადოთ მაგიდა.
მნიშვნელოვანია იცოდეთ, როგორი მაგიდის დამზადება გსურთ. მაღალი მაგისიდისთვის დაგჭირდებათ ორი პალეტის ერთმანეთზე დაწებება ან დახრახვნა, დაბალი მაგიდის შემთხვევაში შეგიძლიათ პირდაპირ შეუდგეთ საქმეს.
პირველი ნაბიჯი გაშალაშინებაა, იმისთვის, რომ მომავალში თავიდან აირიდოთ არაგლუვი ზედაპირით გამოწვეული დისკომფორტი.
კარგად გაშალაშინებულ პალეტს გადაუსვით საღებავი ლილვაკით. შეეცადეთ საღებავი თანაბრად გადაანაწილოთ ზედაპირზე. მას შემდეგ, რაც საღებავი გაშრება, შეგიძლიათ პალეტს ლაქი გადაუსვათ, თუმცა ეს არ წარმოადგენს განსაკუთრებულ აუცილებლობას. ზოგს ურჩევნია საერთოდ არ გამოიყენოს საღებავი და ხის ეფექტის მისაღებად გაშალაშინებულ პალეტს პირდაპირ ლაქს უსვამს.
მას შემდეგ, რაც ლაქიც და საღებავიც კარგად გაშრება, შეგიძლიათ მაგიდას დაადოთ შუშა, რომელიც წინასწარ უნდა შეუკვეთოთ და მაგიდის ზომაზე ამოაჭრევინოთ. შუშის ზომები თითო სანტიმეტრით ნაკლები აიღეთ, ვიდრე მაგიდის, რათა გვერდებში გადმოსვლა აირიდოთ თავიდან. შუშა საკმაოდ მძიმეა, ამიტომ არ მოითხოვს განსაკუთრებულად დამაგრებას.
ახლა გადავიდეთ სავარძელზე.
პირველ რიგში გადაწყვიტეთ, სავარძელს მისაყუდებლით აკეთებთ თუ მის გარეშე. მისაყუდებლიანი სავარძლის შემთხვევაში, პალეტები ნაწილ-ნაწილ უნდა მოამზადოთ და ბოლოს შეკრათ ელექრტოსახრახნის და ხრახნების მეშვეობით.
მისაყუდებლის გასაკეთებლად პალეტი გახერხეთ შუაში, შემდეგ გააშალაშინეთ და შეღებეთ.
დასაჯდომი ნაწილი იმავე პრინციპით კეთდება, როგორც მაგიდა. იმისთვის, რომ დასაჯდომი მეტად კომფორტული გახადოთ აიღეთ ავეჯის ღრუბელი და შემოაკარით წინასწარ შერჩეული ნაჭერი, რომელსაც მარტივად სტეპლერის მეშვეობითაც მიამაგრებთ ღრუბელზე. მისაყუდებლის მისამაგრებლად აუცილებლად გამოიყენეთ ელექტროსახრახნი და ხრახნები.
ავეჯის გასალამაზებლად შეგიძლიათ ქვედა მხარეს დარჩენილ ღიობებში პატარა ყვავილების ქოთნებიც ჩადგათ. ამ ტიპის ავეჯს უკვე არამარტო ეზოებში, არამდედ სახლებშიც აქტიურად იყენებენ. გაითვალისწინეთ, საღებავის და ლაქის წასმისას, თქვენივე უსაფრთხოებისთვის გამოიყენეთ ხელთათმანები და რესპირატორი. გისურვებთ წარმატებას!
