სახლის გასაწმენდად და დასალაგებლად უამრავი ქიმიური საშუალება არსებობს. ცალკე აბაზანისთვის, სანტექნიკისთვის, ფანჯრებისთვის და ა.შ.
თუმცა, როგორც ვიცით, ქიმია საკმაოდ საზიანოა ჯანმრთელობისთვის, მისი გამოყენების შემდეგ აუცილებელია გაანიავოთ ოთახები, ამის მიუხედავად ძლიერი სუნი მაინც რთულად გადის, ხშირად თავს გატკიებთ. განსაკუთრებით საფრთხილოა ქიმიის გამოყენება, როდესაც სახლში მცირეწლოვანი ბავშვი ან შინაური ცხოველია.
გარდა ამ „სიკეთეებისა“ ყოველ ჯერზე ქიმიური ხსნარების შეძენა საკმაოდ ძვირი გიჯდებათ, ზოგჯერ ისეც ხდება, რომ აღმოაჩენთ, სასურველი საწმენდი საშუალებების შეძენა დაგვიწყებიათ.
ბევრი, რომ აღარ შეგაწყინოთ თავი, გასწავლით რამდენიმე უმარტივეს ხერხს, როგორ მოვაშოროთ სანტექნიკას ნადები, სახლში არსებული საშუალებებით.
იცოდეთ, ძმარი თქვენი ძალიან ახლო მეგობარია!
სამზარეულოს და სააბაზანოს ნიჟარებზე, ონკანებზე გაჩენილი ნადები ყველასთვის მტკივნეული თემაა. რამდენიც არ უნდა ალაგოთ, მაინც მალევე ჩნდება ზედაპირზე, რაც ესტეთიურად საკმაოდ ცუდი შესახედია.
- დაასხით ძმარი იმ ადგილს, რომლის გაწმენდაც გსურთ, მოაყარეთ სოდა, გააჩერეთ ცოტა ხანი (10-15 წუთი) შემდეგ კი გაწმინდეთ ჯაგრისით.
- შხაპზე გაჩენილი ნადები ხშირად ხელს უშლის წყლის ჭავლის თანაბრად დინებას. აიღეთ გამძლე ცელოფანი, ისეთი, რომელიც მალე არ გაიხევა, ჩაასხით ძმარი და შემოაკარით შხაპს რეზინის საშუალებით, ისე, რომ შხაპის თავი მთლიანად დაიფაროს ძმრით რამდენიმე წუთის შემდეგ (10-15 წთ.), გაწმინდეთ ჯაგრისით და შედეგით გაოცებულები დარჩებით.
- ახლა გადავიდეთ გაზქურაზე, რომელიც მუდამ გასაწმენდია, იმიტომ, რომ, როგორც არ უნდა შეეცადოთ, ღრმად დარჩენილი ცხიმს მაინც ვერ აცლით ბოლომდე. გამოსავალი აქაც არსებობს. შედგით ღუმელში ფართეპირიან ჭურჭელში ჩასხმული ნიშადურის სპირტი და დატოვეთ მთელი ღამით, დილით სოდამოყრილი ჩვრით გაწმინდეთ.
- რაც შეეხება საკანალიზაციო მილის გაწმენდას. ესეც ერთ-ერთი ყოველდღიური პრობლემაა, რომლის მოგვარებასაც მრავალგვარი ქიმიური საშუალებებით ცდილობთ. არადა, გამოსავალი თურმე ძალიან მარტივია. ჩაყარეთ საკანალიზაციო მილში მარილი, დაახლოებით ერთი სავსე მუჭა და დაასხით მთელი ჩაიდანი მდუღარე წყალი.
არსებობს კიდევ ერთი საშუალება, რომელიც დაგეხმარებათ ნადების და ჟანგის მოცილებაში. ეს არც მეტი არც ნაკლები კოკა-კოლაა.
- დაასხით კოკა-კოლა დაბინძურებულ ადგილს, დაელოდეთ რამდენიმე წუთი და ჩამორეცხეთ წყლით. კოკა-კოლა ასევე უებარი საშუალებაა უნიტაზიდან სიყვითლეების ამოსაყვანად.
- რაც შეეხება დაჟანგულ ადგილებს, დაასხით კოკა-კოლა პრალელურად წმინდეთ ჯაგრისით. თქვენ თვითონვე გაოგნებული დარჩებით, რა მარტივად მოიცილებთ, ამ ერთი შეხედვით, მოუგვარებელ პრობლემას.
გისურვეთ წარმატებას!
