არის საკითხები, რომელიც გამუდმებულ პრობლემად იქცევა, ხოლმე, სახლის დალაგებისას.

როგორც არ უნდა ვეცადოთ, რამდენი ძვირადღირებული საშუალებაც არ უნდა გამოვიყენოთ, მაინც ვერ ვაღწევთ სასურველ შედეგს. ბოლოს ვნებდებით და ასე იწყება გარემონტებული სახლების ნელ-ნელა მოძველება და ხელახლა გასარემონტებელ მდგომარეობამდე მისვლა.

არადა რამდენ დროს, ენერგიას და სახსრებს ვახარჯავთ იმას, რომ სახლი გამოიყურებოდეს ისე, როგორც ჩავიფიქრეთ.

ამისთვის გადავწყვიტეთ დავწეროთ მაქსიმალურად ბევრი პოსტი, როგორ შეიძლება მოვუაროთ სახლს მარტივად, ხელმისაწვდომი საშუალებებით და თანაც ეფექტურად.

დღევანდელ პოსტში შევეხებით სამ მტკივნეულ საკითხს:

• თუჯის აბაზანის გაწმენდა ნადებისგან,
• შუშების წმენდა,
• სარკის დაცვა დაორთქვლისგან;

თუჯის აბაზანის გაწმენდა ნადებისგან

მართალია თანამედროვეობაში სწრაფად შხაპის მიღება აქტუალური თემაა და ბევრი ანიჭებს უპირატესობას საშხაპე კაბინებს, თუმცა ძველებური თუჯის აბაზანაზე უარს ჯერ კიდევ ბევრი ვერ ამბობს. თუჯის აბაზანა ლამაზია და მოსახერხებელიც, თუმცა დაგვეთანხმებით, რომ ნელ-ნელა ყვითლდება, უჩნდება ნადები და რთულდება მოსავლელად. ამისთვის გთავაზობთ შემდეგ გამოსავალს:

გახსენით 2 ლიტრ წყალში 2 ს/კ ძმარი. ჯერ კარგად დაასველეთ აბაზანა, შემდეგ კი თქვენ მიერ დამზადებული ხსნარით გაწმინდეთ. დაელოდეთ 10 წუთი. სანამ ელოდებით მოამზადეთ შემდეგი საწმენდი სითხე, 50გრ. ძმარი + 50გრ. მათეთრებელი. ახლა ამ ხსნარით მოწმინდეთ აბაზანა, დაელოდეთ ნახევარი საათი და სუფთა წყლით კარგად ჩამორეცხეთ.

! გაითვალისწინეთ !  

მათეთრებელს აქვს საკმაოდ მძრაფრი სუნი, ძმარიც პროვოცირებას უკეთებს მის ზემოქმედებას. შესაბამისად აუცილებლად გაიკეთეთ რესპირატორი და დაიცავით თვალები სპეციალური სათვალით. პარალელურად ანიავეთ სააბაზანო ოთახი.

შუშების წმენდა

ფანჯრების წმენდაც იმ სიაში შედის, რომელიც ყველაზე მეტად ეზარებათ ადამიანებს. განსაკუთრებით იმიტომ, რომ შუშა მალევე ისვრება და კარგავს ბზინვარებას.

დაამზადეთ მარტივი ხსნარი, რომელიც დაგეხმარებათ დიდი ხნით შეინარჩუნოთ სახლში სუფთა შუშები.

აურიეთ ერთმანეთში: 2 ს/კ ძმარი, 2 ჭიქა წყალი და ლიმონის წვენი. მიღებული სითხე ჩაასხით მისაშხურებელ ბოთლში და რბილი ნაჭრით გაწმინდეთ შუშები. შეეცადეთ ისეთი ნაჭერი აარჩიოთ, რომელიც ბუსუსებს არ დატოვებს ზედაპირზე.

იგივე მეთოდი შეგიძლიათ გამოიყენოთ საშხაპე კაბინის ზედაპირის წმენდისთვის. ხოლო თუ ზედაპირი აკრილის არის, მაშინ მას მარტივად გაწმენდთ სრულიად ჩვეულებრივი კბილის პასტით.

სარკის დაცვა დაორთქვლისგან

რამდენჯერ გვისიამოვნია ცხელი აბაზანით, მაგრამ დართქლილი სარკის წმენდით გავწვალებულვართ?! როგორც კი პირსახორით ან ჩვრით გავწმენდთ, სარკეზე რჩება წყლის ნაკვალევი, რომელიც რთულად შრება, შედეგად კი ვიღებთ უსუფთაო სარკეს, რომელსაც სპეციალური ხსნარებით ვწმენდთ ყოველ ჯერზე, როდესაც კი ბანაობას გადავწყვეტთ.

ჩვენ გასწავლით მეთოდს, რომელიც დაიცავს სარკეს დაორთქვლისგან და თქვენც მეტად დასვენებული იქნებით.

ერთადერთი ინგრედიენტი, რომელიც ამ საქმისთვის დაგჭირდებათ, მყარი საპონია.

სარკის მთელ ზედაპირზე წაუსვით საპონი ზოლებად, თავიდან სარკე დაიბინდება, თუმცა მას შემდეგ, რაც საპნის ზოლებს რბილი ჩვრით მოწმენდთ, სარკე გახდება პრიალა და რამდენიმე დღის განმავლობაში დაცული იქნება დაორთქვლისგან.

ბოლოდ კი რჩევა მათთვის, ვისაც სურს სარკე მუდამ ბზინავდეს. უბრალოდ წაუსვით სუფთა სარკეს ჩაის ნაყენი.

გისურვებთ წარმატებას!