პარკეტი საკმაოდ დიდი ხანია ითვლება იატაკის საფარად, დაახლოებით მე-13 საუკუნიდან მოყოლებული მას იყენებდნენ სხვადასხვა ზედაპირის მოსაპირკეთებლად და ის დღემდე ყველაზე ძვირადღირებული საფარია.
პარკეტი ინტერიერს ბევრად უფრო მდიდრულ და ლამაზ შესახედაობას სძენს, მზადდება სხვადასხვა ხისგან, რაც განაპირობებს ფასში სხვაობას.
ბევრი რომ აღარ გავაგრძელოთ, ყველას გვსურს ლამაზი იატაკი სახლში და ყოველ ღონეს ვხმარობთ იმისთვის, რომ სასურველ შედეგს მივაღწიოთ. ვზოგავთ თანხებს რემონტზე, ვარჩევთ სასურველ პარკეტს, ვიცით, რომ ფასზე არ უნდა ვიფიქროთ, იმიტომ, რომ კარგი პარკეტი ათეულობით წელი მოგვემსახურება და თავს ვარწმუნებთ, რომ ეს გრძელვადიანი ინვესტიციაა.
და აი, დგება ის მომენტი, როდესაც რემონტი გაკეთებულია, ახალი პარკეტი დაგებულია, თქვენც დადიხართ ამაყად სახლში იქამდე, სანამ არ გაიგებთ ჭრიალის ხმას.
პარკეტის ჭრიალი საკმაოდ გავრცელებული მოვლენაა და მას რამდენიმე მიზეზი აქვს:
- ოთახში ტენიანობის ხშირი ცვლა, რაც პარკეტის ზომაზე მოქმედებს. დროთა განმავლობაში ჩნდება ღარები ფიცრებს შორის და სწორედ ეს წარმოქმნის ჭრიალის ხმას თქვენს სახლში.
- მეორე მიზეზი იატაკის ჭრიალის, არის დასაწყისშივე ცუდად დაგებული პარკეტი, როდესაც ე.წ. სწიაშკაზე ცუდად აწებებენ პარკეტს.
არსებობს რამდენიმე ხერხი,როგორ მოაგვაროთ ეს პრობლემა თქვენთვითონ, ისე, რომ თავიდან არ დაგჭირდეთ ხელოსნების დაქირავება და თქვენი „გრძელვადიანი“ ინვესტიცია წყალში არ ჩაგეყაროთ:
- გამოვიყენოთ შურუპები;
- გამოვიყენოთ სამონტაჟო ქაფი;
- გამოვიყენოთ საპონი ან სახამებელი;
დავიწყოთ შურუპებით და ლურსმნებით.
საჭირო მასალა და ინსტრუმენტები:
- საბურღი (იგივე დრელი);
- შურუპები;
- ფითხი (იგივე შპაკლი);
ამ მეთოდის გამოყენებისას იცოდეთ, შურუპები ჩაასეთ გვერდულად, ყოველთვის გვერდითა ფიცრის მიმართულებით.
ჯერ მონახეთ ის ადგილი, სადაც ჭრიალებს იატაკი, საბურღის დახმარებით მჭიდროდ ჩაასეთ შურუპები გვერდითა ფიცრის მიმართულებით, შემდეგ აუცილებლად „გაშპაკლეთ“ შურუპის თავი და გაშრობის შემდეგ გააშალაშინეთ.
მეორე მეთოდი - სამონტაჟო ქაფი.
საჭირო მასალა და ინსტრუმენტები:
- საბურღი (იგივე დრელი);
- სამონტაჟო ქაფი;
ისევ და ისევ გაიარეთ იატაკზე და მონახეთ, რა აგილას ჭრიალებს. საბურღის დახმარებით გააკეთეთ 8მმ.-იანი ნახვრეტი, ოღონდ გაითვალისწინეთ, რომ დახრა დაახლოებით 45 გრადუსი უნდა იყოს. ეს იმისთვის არის საჭირო, რომ შეძლოთ სამონტაჟო ქაფის შესხმა.
მას შემდეგ, რაც ნახვრეტს გააკეთებს, 30 წამის განმავლობაში შეანჯღრიეთ სამონტაჟო ქაფის ქილა, რაც შეიძლება ღრმად შეიყვანეთ მილი ნახვრეტში და შეუშვით სითხე. ყველაფრის გაშრობას 2-3 საათი სჭირდება. შემდეგ შეგიძლიათ მშვიდად იაროთ სახლში.
ბოლოს, ყველაზე მარტივი და ხელმისაწვდომი ხერხი - საპონი ან სახამებელი.
თუკი იატაკის ჭრაჭუნი პარკეტის ზომის ცვლილებით არის განპირობებული და ნათლად ხედავთ, რომ ფიცრებს შორის დარჩენილია ღარები, გამოიყენეთ საპონი ან სახამებელი.
წაუსვით ღარებში საპნიანი წყალი და აცალეთ გაშრობა ან მოაყარეთ იატაკზე სახამებელი, დააფარეთ გაზეთები და კარგად გაიარ-გამოიარეთ, რომ მასა თანაბრად გადანაწილდეს მთელ ზედაპირზე.
ამ მეთოდის გამოყენება 100%-იან გარანტიას არ გაძლევთ, რომ ჭრიალი შეწყდება, თუმცა ცდად ღირს.
გისურვებთ წარმატებას!
